Xukun gacan goyn ah ayaa maanta galinkii dambe ka dhacay degaanka Kuunyo-barrow ee gobolka Shabeelaha hoose, iyadoo ay u soo daawasho tageen dadweyne badan oo Al-shabaab ay isugu yeertay.

Waxaa xukunka lagu fuliyay labo nin oo lagu eedeeyay iney jabsadeen dukaan ku yaalla degaanka Ambareso oo ku yaalla afaafka hore ee degmada Baraawe, ayna ka qaateen 17 milyan lix boqol iyo 73 kun oo shilinka Soomaaliga ah.

Qaadiga xukunka riday ayaa waxa uu sheegay in maxkamadda Al-shabaab ee Kurtunwaarey uu u soo dacwooday ninka dukaanka laga jabsaday oo lagu magacaabo Cabdalla Bakar Cabdalla, isagoo ku eedeynaya iney xatooyada u geysteen Maxamuud Maxamad Xassan oo 54 sano jir ah iyo Xassan Maxamad Yuusuf oo 45 sano jir ah.

Maxkamadda ayaa u yeertay labadan nin oo kala deganaa degmada Baardheere iyo degaan ka tirsan Jubooyinka, waxayna qirteen sida qaadigu sheegay iney xatooyadaas ku kaceen, waxaana lagu xukumay in mid kasta gacanta midig laga jaro iyo iney milkiilaha u celiyaan lacagtiisii kaasoo galabta lagu fuliyey.

LEAVE A REPLY

Please enter your comment!
Please enter your name here